Fermingarnámskeið á Laugum í Sælingsdal 2018

Kæra fermingarbarn og fjölskylda!
Í þessu bréfi er að finna allt sem máli skiptir varðandi fermingarnámskeiðið nú í september. Því er mikilvægt að kynna sér efni þess vel. Námskeiðið verður á Laugum í Sælingsdal í Dölum (20 km. frá Búðardal)
 
Brottför og heimkoma:
Mæting á Laugum er mánudaginn 3. september kl. 14. Lagt er af stað um morguninn úr Ólafsvíkurkirkju kl. 10:30. Áætlaður komutími í Ólafsvíkurkirkju er um kl. 16:45 miðvikudaginn 5. sep.
                             
Verð:
Héraðssjóður prófastsdæmisins og sóknir/kirkjudeildir fermingarbarnanna niðurgreiða oft námskeiðið að hluta, en hlutur barns er 4.000,-. Koma má greiðslu til sóknarprests fyrir ferðalagið, greiða inn á reikning 194-15-550536, kt. 430111-0350, eða að börnin greiði gjaldið í rútunni. Innifalið í verðinu eru ferðir frá Laugum, matur frá kaffi á miðvikudegi til og með hádegismat á föstudegi. (Ath. fimm máltíðir hvern heilan dag).
 
Farangur:
Hafa þarf meðferðis sængur- og koddaver, lak, snyrtidót. Biblíu eða Nýja testamenti, skriffæri, fermingarkver, góð föt til skiptanna, húfu, vettlinga, stígvél, strigaskó, skó sem mættu blotna, innanhúsíþróttaskó, íþróttaföt, sundföt, a.m.k. tvö handklæði, úlpu, regnföt, stuttbuxur, stuttermaboli, e.t.v. myndavél ofl. sem þarf til ferðalaga í íslensku veðri. Nesti fyrir ferð á Lauga eða pening til að kaupa hádegismat í Búðardal.
 
Ekki hafa með:
Símar (af fenginni reynslu valda þeir of mikilli truflun á námskeiðinu.) Ef einhver tekur síma með þá verður hann geymdur til heimferðar. Hægt er að fá að hringja á Lauga ef brýna nauðsyn ber til. (Síminn á Laugum er: 434-1600.) Einnig er hægt að hringja í vaktsíma sóknarprestsins (844-5858). Hljómflutningstæki með hátölurum. DVD tæki.  Vert er að taka fram að börnin bera sjálf ábyrgð á þeim verðmætum sem þau hafa meðferðis þannig að best er að forðast að taka með sér dýra og verðmæta hluti. Popp, snakk og tyggjó eru ekki leyfð á Laugum.
 
Óskilamunir:
Ef eitthvað gleymist á staðnum er hægt að hafa samband við Ungmenna og tómstundabúðirnar á Laugum í s. 434-1600.
 
Agamál:
Ætlast er til að allir þátttakendur mæti með jákvæðu hugarfari og leggi sitt að mörkum til að allir fái notið dvalarinnar. Hver einstaklingur er ábyrgur fyrir hugsanlegu tjóni sem hann kann að valda. Skyldumæting er á alla viðburði. Viðurlög eru við öllum brotum og brot geta varðað brottrekstri af mótinu. Er þess vænst að foreldrar veki athygli barna sinna á mikilvægi þessa að virða reglur og mörk til að námskeiðið heppnist vel.
 
Dagskrá námskeiðsins:
Hver hópur hefur þrjár kennslustundir með sínum presti að morgni. Eftir hádegi skiptist á frjáls tími þar sem hægt er að velja um íþróttaiðkun, útiveru ofl., hópastarf og kennsla. Eftir kvöldmat verða kvöldvökur og/eða helgihald. Gert er ráð fyrir 2 guðsþjónustum með ólíku sniði á námskeiðinu, þ.e. popp- og almenn guðsþjónusta sem verður í Hjarðarholti á miðvikudegi.
 
Skráning/forföll/veikindi/óhöpp:
Gert er ráð fyrir öllum fermingarbörnum sóknanna á námskeiðið. Ef einhver forfallast þarf að tilkynna sínum sóknarprest það hið fyrsta. Það er afar óheppilegt því mjög mikilvægur hluti fræðslunnar fer fram á Laugum, auk samfélagsins við aðra krakka. Ef einhver veikist á námskeiðinu verður haft samband við foreldra og metið í samráði við þá hvort barnið skuli sótt. Ef leita þarf læknis er sú þjónusta í Búðardal.
 
Lyf/óþol/ofnæmi:
Ef fermingarbarn notar lyf skal tilkynna presti sínum það. Nauðsynlegt er að afhenda lyfin í síðasta lagi á Laugum og eru þau þá geymd á öruggum stað og afhent á matmálstímum eða eftir því sem þarf. Það er form sem hefur reynst mjög vel. Eins er nauðsynlegt að láta viðkomandi prest vita um sérþarfir og/eða vandamál sem vitað er að gætu komið upp. Mataróþol eða ofnæmi þarf að tilkynna til prests fyrir 26. ágúst og hann til mótsstjóra.
 
Starfsfólk:
Stjórn og skipulagning námskeiðsins er í höndum prestanna í prófastsdæminu sem og forstöðumanns á Laugum. Prestarnir annast fræðsluna og taka þátt í annarri dagskrá. Laugar útvegar starfsfólk í eldhús og þrif auk gæslumanna sem eru sérstaklega staðkunnugir.
 
Vonandi svarar þetta bréf flestum hugsanlegum spurningum. Nánari upplýsingar veitir séra Óskar Ingi í síma 844-5858.